|
Рождество Пресвятыя Богородицы.
На малей вечерни, стихиры на 4, глас 1.
Подобен: Небесных чинов:
Иоаким и Анна торжествуют, Начаток рождше нашего спасения, Едину Богородицу, с нимиже и мы празднуем днесь, от корене онаго Иессеева, блажаще Деву Чистую.
От Анны днесь Цвет, Сад Богоданный, Богородица прозябе спасение человеков, из Неяже всех Зиждитель рождься паче ума, Адамову очищает, яко Благ, всю скверну благостию.
Кто довольно по достоинству пети возможет, от Анны неизреченно младенствующую Деву; горы убо и холмы сладость искапайте днесь: всех бо Жизнь и Очищение млеком питается, Богородица Чистая.
Иже прежде неплодная страна, Землю плодоносну раждает: и от неплодныя утробы Плод свят давши, млеком питается. Чудо страшно, Питательница жизни нашея, яже Небесный Хлеб во чреве приемши, млеком от сосцу питается.
Слава, и ныне, глас 4:
Всечестное Твое Рождество, Пресвятая Дево Чистая, Ангелов множество на Небеси, и человеческий род на земли ублажаем: яко Мати была еси Творца всех Христа Бога. Того молящи о нас не престай молимся, иже на Тя по Бозе упование положших, Богородице Всепетая и Неискусобрачная.
Hа стиховне, стихиры, глас 2.
Подобен: Доме Ефврафов:
Радуйтеся, Иоакиме и Анно, радуйтеся, яко радости и спасения Ходатаица, от неплодове Дева, нам раждается.
Стих: Слыши, Дщи, и Виждь, и приклони ухо Твое.
Ты Едина земных показалася еси спасение, яко рождши Слово, паче слова и естества: тем Тя ублажаем.
Стих: Лицу Твоему помолятся богатии людстии.
Отложи Адаме и Ево, всяку печаль: Мати бо Радости от неплодове преславно прозябает днесь.
Слава, и ныне, подобен тойже:
Храм Божий, Едина Богородица, от неплодове и нераждающия происходит: и радуется Адам, взывая.
Тропарь, глас 4:
Рождество Твое Богородице Дево, радость возвести всей вселенней: из Тебе бо возсия Солнце Правды Христос Бог наш, и разрушив клятву, даде благословение, и упразднив смерть, дарова нам живот вечный.
На велицей вечерни стихологисуем, Блажен муж, 1 антифон.
На Господи, воззвах, стихиры на 3, глас 6, самогласны. Сергиа патриарха:
Днесь Иже на разумных Престолех почиваяй Бог, Престол свят на земли Себе предуготова: утвердивый мудростию Небеса, Небо одушевленное человеколюбием содела: от неплоднаго бо корене, Сад живоносен израсти нам, Матерь Свою, Иже чудес Бог, и ненадеющихся Надежда, Господи, слава Тебе. Единожды.
Сей день Господень, радуйтеся, людие: се бо Света чертог, и Книга Слова Животнаго, из утробы произыде. И иже к востоком дверь рождшися, ожидает входа Святителя Великаго, Едина и Единаго вводящи Христа во вселенную, во спасение душ наших. Единожды.
Аще и Божественным хотением, светлыя неплодны жены прозябоша, но всех Мариа рожденных боголепно превозсия: яко от неплодныя преславно рождшися Матере, породи плотию всех Бога, паче естества от безсеменныя утробы: Едина Дверь, Единороднаго Сына Божия, Юже прошед заключенну сохрани, и вся мудре устроив, яко весть Сам, всем человеком спасение содела. Дважды.
Стефана Святоградца:
Днесь неплодная врата отверзаются, и Дверь девическая Божественная предгрядет. Днесь Плод раждати благодать начинает, являющи мiру Божию Матерь, Еюже земная с небесными совокупляются, во спасение душ наших. Дважды.
Днесь всемiрныя радости провозвещение, днесь возвеяша ветри, спасения провозвестницы, естества нашего разрешается неплодство: неплоды бо мати показуется, Девствующия и по Рождестве Зиждителеве, из Неяже чуждее присвояет иже естеством Бог, и заблуждшым плотию спасение содевает, Христос Человеколюбец, и Избавитель душ наших. Единожды.
Днесь неплодная Анна раждает Богоотроковицу, от всех родов произбранную в Жилище всех Царя, и Зиждителя Христа Бога, во исполнение Божественнаго смотрения: Имже наздахомся земнороднии, и обновихомся, от тли к жизни неконечней. Единожды.
Слава, и ныне, первую стихиру: Днесь Иже на разумных Престолех:
Вход. Прокимен дне. И чтения три.
На стиховне, глас 4.
Всемiрная радость от праведных возсия нам, от Иоакима и Анны, Всепетая Дева: яже премногия ради чистоты Храм Божий одушевленный бывает, и Едина воистинну Богородица познавается. Тоя молитвами Христе Боже, мир мiру низпосли, и душам нашим велию милость.
Стих: Слыши, Дщи, и виждь, и приклони ухо Твое.
Ангеловым проречением, Плод пречист от Иоакима и Анны, праведников днесь произыде Дево, Небо и Престол Божий, и приятелище Чистоты, радость провозвещающе всему мiру. Живота нашего Ходатаице, клятвы отъятие, благословения подание. Тем в Рождестве Твоем, Дево Богозванная, мiру мир испроси, и душам нашим велию милость.
Стих: Лицу Твоему помолятся богатии людстии.
Неплоды безчадная Анна, днесь руками да восплещет светло, да светлоносят земная, царие да играют, святителие во благословениих да веселятся, да празднует весь мiр: се бо Царица и Непорочная Невеста Отча от корене Иессеева прозябе. Ктому жены в печалех не родят чад: Радость бо процвете, и Живот всем человеком в мiре жительствует. И ктому дары Иоакимовы не возвращаются, рыдание бо Анны в радость преложися: радуйтеся мне, глаголющи, весь избранный Израиль. Се бо даде ми Господь Одушевленную Палату Божественныя славы Его, во общее веселие и радость, и спасение душ наших.
Слава, и ныне, глас 8. Сергиа Патриарха:
Приидите вси вернии, к Деве тецем: се бо раждается, яже прежде чрева предвиденная Бога нашего Мати, девства Сосуд, Ааронов прозябший Жезл от корене Иесеева, пророческое проповедание, и праведных Иоакима и Анны прозябение. Раждается убо, и мiр с Нею обновляется. Раждается, и Церковь во свое благолепие украшается. Храм святый Божества приятелище, девственный Сосуд, царский Чертог: в Немже преславное неизреченнаго соединения сошедшихся во Христа естеств cовершенное содеяся таинство. Емуже покланяющеся, воспеваем Девы Всенепорочныя Рождество.
На благословении хлебов тропарь: Рождество Твое, Богородице Дево (трижды), писан на малей вечерни.
На утрени, на Бог Господь тропарь праздника трижды.
По 1-й стихологии седален, глас 4.
Подобен: Удивися Иосиф:
Возопий Давиде, что клятся тебе Бог; яже мне клятся, рече, и исполни уже: от плода чрева моего давый Девицу, из Неяже Содетель Христос, новый Адам, родися Царь на престоле моем: и цаствует днесь, имеяй Царство недвижимо. Неплоды раждает Богородицу, и Питательницу жизни нашея.
Слава, и ныне, тойже. И чтение праздника.
По 2-й стихологии, седален, глас 4.
Подобен: Удивися Иосиф:
От корене Иессеева, и от чресл Давидовых, Богоотроковица Мариам раждается днесь нам, радостию бо радуются всяческая и обновляются. Срадуйтеся купно Небо и земля: восхвалите Ю отечествия язык: Иоаким веселится, и Анна торжествует, зовущи: неплоды раждает Богородицу, и Питательницу жизни нашея.
По полиелеи седален, глас 8.
Подобен: Повеленное тайно:
Да радуется Небо, и земля да веселится: Божие бо Небо на земли родися Богоневестная Сия, от обетования. Неплоды Младенца доит Марию, и радуется о рождестве Иоаким: Жезл, глаголя, родися мне, из Негоже Цвет Христос прозябе, из корене Давидова. Воистинну чудо преславно.
Слава, и ныне, глас тойже:
Обновися Адаме, радуйся Ево, веселися Давиде, благодушествуй Анно: ибо Мати Зиждителя твоего раждается преславно, ликует обновльшися вся земля, и радуется одеяна во одежду: всяк язык ликуя да вопиет Марии: блажен дом Давидов, яко питает Питательницу жизни нашея.
И чтем слово Григориа иеромонаха.
Степенна, 1 антифон 4-го гласа.
Прокимен, глас 4: Помяну Имя Твое во всяком роде и роде.
Стих: Отрыгну сердце мое слово благо.
Всякое дыхание да хвалит Господа.
Стих: Хвалите Бога во святых Его:
Евангелие от Луки, зачало 4: Во дни оны, воставши Мариам:
По 50-м псалме, слава: Молитвами Богородицы, Милостиве, очисти множества согрешений наших.
И ныне тойже.
И посем, Помилуй мя Боже:
И стихира праздника, глас 6:
Сей день Господень, радуйтеся, людие: Се бо Света Чертог, Книга Слова Животнаго, из утробы произыде, и яже к Востоком Дверь рождшися, ожидает входа Святителя Великаго, Едина и Единаго вводящи Христа во вселенную, во спасение душ наших.
Канона два, ирмосы обоих канонов по дважды, тропари же их на 12.
Канон первый, творение Кир Иоанна.
Глас 2.
Песнь 1. Ирмос:
Грядите людие, поим песнь Христу Богу, раздельшему море, и наставльшему люди, яже изведе из работы египетския, яко прославися.
Грядите вернии, Духом Божественным радующеся, Юже от неплодове днесь пришедшую, человеков на спасение, Приснодеву Отроковицу песньми почтим.
Радуйся Чистая, Мати и рабо Христа Бога, Яже Первому Ходатаица блаженству человеческий род Тя, вси достойно песньми славим.
Жизни раждается днесь Мост, Имже человецы воззвание падения, еже от ада обретшии, Христа Жизнодавца песньми прославляют.
Ин канон, Кир Андреа, глас 8.
Песнь 1. Ирмос:
Сокрушившему брани мышцею Своею, и проведшему Израиля сквозе Чермное море, поим Ему ко Избавителю нашему Богу: яко прославися.
Да ликовствует вся тварь, да веселится же и Давид: яко от колена и от семене его произыде Жезл, Цвет носящи Господа, Творца всяческих.
Святая святых, во святем святилищи Младенец возлагается воспитатися от руки ангеловы: вси убо верно спразднуим в Рождестве Ея.
Неплоды нераждающая Анна, но не безчадна Богу: се бо пронаречеся от родов Чистая Дева Мати. Темже естества израсти Зиждителя в рабии образе.
Тя незлобивую Агницу, Агнца Христа, Младенца от чрева Твоего приведшую в ныне существо вси, от Анны рожденную Тя, песньми почитаем.
Троичен:
Три Безначальна славлю, Три Свята пою, Три Соприсносущна в Существе Едином проповедую: Един бо во Отце, и Сыне, и Дусе, славословится Бог.
Богородичен:
Кто виде отроча, егоже не всея отец, млеком питаемое; или где видена бысть дева мати; истинно паче ума обоя, Богородительнице Чистая.
Катавасиа:
Крест начертав Моисей впрямо жезлом Чермное пресече, Израилю пешеходящу: тоже обратно фараоновым колесницам, ударив совокупи, вопреки написав непобедимое оружие: тем Христу поим Богу нашему, яко прославися.
Песнь 3. Ирмос:
Утверди нас в Тебе, Господи, древом умерщвлей грех, и страх Твой всади в сердца нас поющих Тя.
Непорочно Богу пожившии, всех родисте Спасение, Богомудрии родителе, Зиждителя рождшия и Бога нашего.
Всем жизнь источаяй Господь, от неплодове произведе Деву, в Нюже вселитися изволи, и по Рождестве сохранив нетленну.
Аннин плод, Марию, днесь, Грозд Рождшую живоносный, яко Богородицу воспоим, Предстательницу же всех и Помощницу.
Ин. Ирмос:
Утвердися сердце мое во Господе, вознесеся рог мой Бозе моем, разширишася на враги моя уста моя, возвеселихся о спасении Твоем.
Воспитавшися во Святая святых, Дево Пречистая Богородице, вышши явилася еси твари, Зиждителя плотию порождши.
Благословено чрево Твое целомудренная Анно, Плод бо израстила еси девства, Юже безсеменно Питателя твари Рождшую и Избавителя Иисуса.
Тя блажит Приснодево, вся тварь, от Анны днесь рождшуюся, от корене Иессеева Жезл Пречист Цвет, Христа израстившую.
Тя высшую всея твари Богородице, показуя Чистая, Сын Твой, еже от Анны величит Твое Рождество, и всех веселит днесь.
Троичен:
Тебе покланяемся, Отче, Безначальне Существом, поем Безлетнаго Сына Твоего, и чтем Соприсносущнаго Духа Твоего, яко Единаго Трое естеством Бога.
Богородичен:
Светодавца и Начальника жизни человеческия, рождшая Чистая Богородице, явилася еси Сокровище жизни нашея, и Дверь неприступнаго Света.
Катавасиа:
Жезл во образ тайны приемлется, прозябением бо предразсуждает священника: неплодящей же прежде Церкви, ныне процвете, древо Креста, в державу и утверждение.
Седален, глас 4.
Подобен: Удивися Иосиф:
Дева Мариа и Богородица истинно, яко облак света днесь возсия нам, и от праведных предгрядет в славу нашу. Не ктому Адам осуждается, и Ева от уз свободися, и сего ради зовем вопиюще со дерзновением Единей Чистей: радость возвещает Рождество Твое всей вселенней.
Слава, и ныне, тойже.
Песнь 4. Ирмос:
Услышах Господи, слух Твоего смотрения, и прославих Тя, Едине Человеколюбче.
Воспеваем Тя Господи, верным спасительное Пристанище подавшаго всем, Тебе рождшую.
Тя Богоневесто, похвалу всем Христос яви и державу, поющым верно Твое таинство.
Неискусобрачная Владычице, Твоими молитвами избавляеми прегрешений, благоразумно вси Тя ублажаем.
Ин. Ирмос:
Пророк Аввакум, умныма очима провиде Господи, пришествие Твое, тем и вопияше: от юга приидет Бог. Слава силе Твоей, слава снизхождению Твоему.
Патриарх Иаков, провидев, Спасе, величия ясно строения Твоего, вопияше Духом, ко Иуде глаголя тайно: от леторасли возшел еси Сыне мой, возвещая Тя от Девы Бога.
Ныне Жезл Ааронов, от корене Давидова прозябший, ныне Дева Чистая происходит: и сликовствует небо и земля, и вся отечествия языков, и Анна и Иоаким таинственно.
Ныне да веселится небо, да радуется же земля, и да ликуют Иоаким и Давид. Ов убо яко родитель Твой, истинно Рождшия Бога: ов же яко праотец Твой, проповедая Твоя величествия, Чистая.
Срадуется Тебе днесь, богомудренная Анно, вселенная: Избавителя бо тоя Матерь процвела еси, Юже от корене прозябшую Давидова, Жезл Силы нам носящую Цвет, Христа.
Троичен:
Славлю Безначальна Бога, Отца и Сына и Святаго Духа, Единосущную Троицу Несозданную, Ейже предстоят Серафими благоговейно, зовуще: Свят, Свят, Свят еси Боже.
Богородичен:
Пребезначальное Начало начало приемлет из Тебе, Богородительнице, плотским временем, и пребывает собезначально, и воплощься Слово Отчее, и Духу соприсносущное, сохраняя Божественное достоинство.
Катавасиа:
Услышах, Господи, смотрения Твоего таинство, разумех дела Твоя, и прославих Твое Божество.
Песнь 5. Ирмос:
Сеннописанный мрак гаданий разорив, и верных прибытием истины, Богоотроковицею озарив сердца, и нас светом Твоим Христе, настави.
Воспоим людие всех Вину, сущаго по нам быти Виновнаго: Еяже образу радовахуся сподобляеми пророцы, явленное спасение от Тоя плодяще.
От суха прозябение жезла иереева, Израилю показа проразсуждение: и ныне светлость прозябших преславно светит, от неплодове всеславное Рождение.
Ин. Ирмос:
Господи Боже наш, мир даждь нам, Господи Боже наш стяжи ны, Господи, разве Тебе иного не вемы, Имя Твое именуем.
Пречистое Твое Рождество, Дево Непорочная, несказанное, и зачатие неизглаголанно и рождение Твое, Невесто Неневестная: Бог бо бе весь в мя облекийся.
Днесь да веселятся ангельстии чини, песньми да ликуют сущии из Адама: родися бо Жезл, Цвет возрастивший Христа Единаго, Избавителя нашего.
Днесь Ева разрешается осуждения, разрешается же и неплодство, и Адам древния клятвы, о Рождестве Твоем: Тобою бо от тли избавихомся.
Слава Тебе прославльшему неплодную диесь: роди бо Жезл присноцветущий от обещания, от Негоже прозябе Христос, Цвет жизни нашея.
Троичен:
Слава Тебе, Отче Святый, Боже Нерожденне: слава Тебе, Сыне Безлетне, Единородне: слава Тебе, Душе Божественный и Сопрестольный, от Отца происходяй, и в Сыне пребываяй.
Богородичен:
Бысть чрево Твое Солнца носило: пребысть чистота Твоя якоже прежде невредима, Дево: Христос бо Солнце, яко от чертога Жених, явися из Тебе.
Катавасиа:
О Треблаженное Древо, на немже распяся Христос Царь и Господь, Имже паде, древом прельстивый тобою прельстився, Богу пригвоздившуся плотию, подающему мир душам нашым.
Песнь 6. Ирмос:
Ко Господу от кита Иона возопи: Ты мя возведи из глубины ада, молюся, да яко Избавителю, во гласе хваления, истины же духом пожру Тебе.
Ко Господу в скорби неплодства возопиша, Богоматере Богомудрии родители, и Сию в роды родов родиша, на общее спасение и похвалу.
Прияша небесный Дар от Бога достоин, Богоматере Богомудрии родители, самех Херувимов превышшее Носило, Слова и Зиждителя Родительницу.
Ин. Ирмос:
Яко воды морския, Человеколюбче, волнами житейскими обуреваюся, темже яко Иона, тако вопию Ти: возведи от тли живот мой, благоутробне Господи.
Святую святых сущу, целомудреннии родители Твои Чистая, возложиша Тя в храме Господни воспитатися честно, и уготоватися в Матерь Ему.
Неплоды и матери ликуйте, дерзайте и играйте безчадныя: безчадна бо неплоды Богородицу прозябает, яже избавит от болезней Еву, и клятвы Адама.
Слышу Давида поюща Тебе: приведутся Девы во след Тебе, приведутся в храм Царев. И с ним Тя и аз, Дщерь Цареву, воспеваю.
Поем святое Твое Рождество, чтим и непорочное зачатие Твое, Невесто Богозванная и Дево: славят же с нами Ангелов чини, и святых душы.
Троичен:
В Тебе Троическое таинство поется, и славится Чистая: Отец бо благоволи, и Слово вселися в Тя, и Божественный Дух Тебе осени.
Богородичен:
Златая Кадильница была еси, Огнь бо во утробе Твоей вселися, Слово от Духа Свята, и человеческим зраком в Тебе видеся, Богородительнице Чистая.
Катавасиа:
Воднаго зверя во утробе длани Иона крестовидно распростер, спасительную страсть проображаше яве. Тем тридневен изшед, премiрное воскресение прописаше, плотию пригвожденнаго Христа Бога, и тридневным воскресением мiр просвещшаго.
Кондак, глас 4:
Иоаким и Анна поношения безчадства, и Адам и Ева от тли смертныя свободистася, Пречистая, во святем Рождестве Твоем. То празднуют и людие Твои, вины прегрешений избавльшеся, внегда звати Ти: неплоды раждает Богородицу и Питательницу жизни нашея.
Икос:
Молитва купно и воздыхание, неплодства и безчадства, Иоакима же и Анны благоприятное, и во уши Господни вниде, и прозябе Плод живоносен мiру. Ов бо молитву на горе творяше: ова же в саде поношение ношаше: но с радостию неплоды раждает Богородицу, и Питательницу жизни нашея.
Песнь 7. Ирмос:
Купина в горе огненеопальная, и росоносная пещь халдейская, яве предписа Тя, Богоневесто, Божественный бо Невещественный в вещественнем чреве, Огнь неопально прияла еси. Темже из Тебе Рождшемуся поем: благословен еси Боже отец наших.
Твое в вещественных явлениих законоположник возбранися разумети, и великое, Пречистая, таинство, не мудрствовати земноревностная образно наказуемь иногда. Темже удивлься чудеси, глаголаше: благословен Бог отец нашых.
Гору и Дверь Небесную, и мысленную Тя Лествицу Боголепно лик Божественный пронарече: от Тебе бо Камень отсечеся не руками мужескими, и Дверь Еюже пройде Господь, Иже чудес Бог отец наших.
Ин. Ирмос:
Халдейская пещь огнем распалаемая, орошашеся Духом, Божии предстоянием, отроцы пояху: благословен еси, Боже отец нашых.
Празднуем, Чистая, и верно покланяемся святому Твоему Рождеству, поюще Сына Твоего, Имже избавихомся древняго Адамова ныне осуждения.
Ныне Анна веселится, и вопиет хвалящися: неплоды сущи родих Божию Матерь, Еяже ради осуждение Евино разрешися, и яже в печалех болезнь.
Адам свободися, и Ева ликует, и вопиют духом к Тебе, Богородице: Тобою избавихомся первородныя клятвы явльшуся Христу.
О, чрево, вместившее Божие Селение! О утробо, носившая небес Ширшую, Престол святый, мысленный Кивот Священия.
Троичен:
Отца прославим, Сына, и Духа, во Единстве Божества Троицу Пресвятую, Нераздельную, Несозданную, и Соприсносущную, и Единосущуную.
Богородичен:
Ты Бога Едина родила еси Дево преславно, Ты естество обновила еси Рождеством Твоим Марие, Ты Еву разрешила еси первородныя клятвы, Богородительнице Чистая.
Катавасиа:
Безумное веление мучителя злочестиваго люди поколеба, дышущее прещение и злохуление богомерзкое: обаче три отроки не устраши ярость зверская, ни огнь снедаяй, но противодышущу росоносному Духу, со огнем суще пояху: Препетый отцев и нас Боже благословен еси.
Песнь 8. Ирмос:
В пещи отрочестей прообразил еси иногда Твою Матерь Господи, образ же Сия из огня изымаше, неопально входящыя. Юже поем явльшуюся Тобою концем днесь, и превозносим во вся веки.
Иже к Богу нашего примирения, предопределенная Скиния, еже быти ныне начинает, имущи родити Слова, нам дебелством плоти явльшася. Егоже поем, из не сущих во еже быти Тем приемшии, и превозносим во вся веки.
Неплодства преложение, мiрское благих разреши неплодство, и ясно чудо Христа показа, к земным пришедша. Егоже поем, из не сущих во еже быти Тем приемшии, и превозносим во вся веки.
Ин. Ирмос:
Покрываяй водами превыспренняя Своя, полагаяй морю предел песок, и содержай вся, Тя поет солнце, Тя славит луна, Тебе приносит песнь вся тварь, яко Содетелю всех во веки.
Сотворивый преславная неплодней утробе, отверзый Анны нераждающая ложесна, и Плод ей дав, Ты Боже Святый, Ты Сыне Девы, Ты от Сея плоть приял еси Присноцветущия Девы и Богородицы.
Затворяяй бездну, и отверзаяй ю, возносяй воду во облацех и даяй дождь, Ты давый Господи, от неплоднаго корене прозябнути Анны святыя пречист Плод, и родити Богородицу.
Делателю мыслей наших и Насадителю душ наших, Ты неплодную землю благоплодну показавый, Ты древле сухую, родовиту, благокласну, бразду плодоносну соделал еси Анну святую, пречист Плод израстити Богородицу.
Приидите вси узрим, яко от чертога мала, Божий Град ныне раждаемый, иже от двери утробныя исход имущую, вход же не ведущу общения: Един Бог Зиждитель Сею пройде стезею странною.
Троичен:
О Троице Пресущная, Единица Собезначальная! Тя поет и трепещет множество Ангел, небо и земля, и бездны ужасаются, человецы благословят, огнь работает, вся послушают Тебе, Троице Святая со страхом, яже в твари.
Богородичен:
О новейшаго слышания: Бог, Сын Жены! О безсеменнаго Рождества! Безмужная Мати и Рожденное Бог! О ужаснаго видения! О зачатия страннаго Девы! О несказаннаго Рождества! Истинно паче ума вся, и видения.
Катавасиа:
Благословите отроцы, Троицы равночисленнии, Содетеля Отца Бога, пойте снизшедшее Слово, и огнь в росу претворшее, и превозносите всем жизнь Подавающаго, Духа Всесвятаго, во веки.
На 9-й песни, Честнейшую не поем, прежде же ирмоса и тропарей, припев сей поем: Величай, душе моя, преславное Рождество Божия Матере.
Песнь 9. Ирмос:
Иже прежде Солнца Светильника Бога возсиявшаго, плотски к нам пришедшаго, из боку Девичу, неизреченно воплотившая, Благословеная Всечистая, Тя Богородице величаем.
Иже непокоривым людем из камене источив воду, благопокоривым же языком дарует от чресл неплодных Плод на веселие нам Тя, Богомати Пречистая, Юже достойно величаем.
Напраснаго древняго отъятельницу осуждения и праматере исправление: юже рода к Богу вину присвоения, к Зиждителю Мост, Тя Богородице величаем.
Другий припев: Величай, душе моя, от неплодове Рождшуюся Деву Марию.
Ин. Ирмос:
Чужде матерем девство, и странно девам деторождение: на Тебе, Богородице, обоя устроишася. Тем Тя вся племена земная непрестанно величаем.
Достойное, Богомати, Твоея чистоты Рождество наследовала еси, чрез обещание: иногда бо неплодней, Богопрозябен Плод вдалася еси: тем Тя вся племена земная непрестанно величаем.
Исполнися вопиющаго пророчество, глаголет бо: восставлю скинию падшую священнаго Давида, в Тебе Чистая прообразившуюся, Еяже ради всех человеков персть в тело создася Божие.
Пеленам покланяемся Твоим Богородице, славим Давшаго Плод прежде неплодней, и отверзшаго ложесна нераждающей преславно. Творит бо вся, елика хощет, Бог Сый Самовластен.
Яко дар Тебе, Богородице, песнопение от Анны рождшейся верно дароносим: матери Матерь, девы же Деву Едину славословяще покланяемся Тебе, поем и славим.
Троичен:
Чужде есть беззаконным славити Безначальную Троицу, Отца, и Сына же, и Святаго Духа, несозданное Вседержавство, Еюже мiр весь содержится, манием Державы Ея.
Богородичен:
Вместила еси во утробе Твоей, Дево Мати Единаго от Троицы Христа Царя, Егоже поет вся тварь, и трепещут вышнии чини: Того моли, Всечистая, спастися душам нашым.
Катавасиа с припевы праздника:
Таин еси Богородице Рай, невозделанно возрастивший Христа, Имже крестное живоносное на земли насадися древо. Тем ныне возносиму, покланяющеся Ему Тя величаем.
И другий:
Снедию древа роду прибывшая смерть, Крестом упразднися днесь: ибо праматерняя всеродная клятва разрушися, прозябением Чистыя Богоматере, Юже вся силы небесныя величают.
Светилен: От неплодныя днесь Анны Цвет произыде Богородица, вся благовония Божественнаго исполняющи концы мiра, и радости всю наполняющи тварь: Юже поюще достойно восхваляем, яко сущу земнородных Превышшую.
Дважды.
Слава, и ныне:
Адаме обновися, и Ева возвеличися, пророцы со апостолы ликуйте и праведными: общая бо радость возсия, Ангелов же и человеков, от праведных Иоакима и Анны Богородица Мариа.
На хвалитех стихиры на 4, глас 1.
Подобен: О дивнаго чудесе:
О дивнаго чудесе! Источник Жизни от неплодныя раждается, и благодать плодородити светло начинается, веселися Иоакиме, Богородицы быв родитель: несть ин якоже ты, земнородных родителей Богоприятне: Боговместимая бо Отроковица, Божие Селение, Пресвятая Гора, тобою нам даровася. Дважды.
О дивнаго чудесе! От неплодове Плод возсия, мановением всех Содетеля и Вседержителя: доблественно мiрское благих разреши неплодство. Матери с материю Богородичною ликуйте, зовуще: Обрадованная, радуйся, с Тобою Господь, подаяй мiру Тобою велию милость.
Столп целомудрия одушевлен, и светлое приятелище, блистающееся благодатию, Анна благославная явльшися, породи забрало воистинну девства, Божественное Процветение: яже всем девственным, и девства желающым дарование, девства доброту, яве Подающую, и Дарующую всем верным велию милость.
Слава, и ныне, глас 6. Самогласен:
Сей день Господень, радуйтеся людие: се бо света Чертог и Книга Слова Животнаго из утробы произыде, и яже к востоком Дверь рождшися, ожидает входа Святителя Великаго, Едина и Единаго вводящи Христа во вселенную, во спасение душ наших.
Славословие великое.
По Трисвятом тропарь праздника единожды, ектении и отпуст.
 Скачать zip-файл.
|
